ROXAS CITY – Nadakpan sa akto nga nagapakighilawas sa madulom nga bahin sang baybayon sang Roxas City ang duha ka tawo.
Sa interview sang Bombo Radyo kay Punong barangay Reynaldo Magallanes sang Barangay Baybay, Roxas City, ginpahayag sini nga mismo ang kagawad kag mga tanod ang nakadakup sa tricycle driver kag kaupod nga babaye samtang nagapatrolya sa lugar.
Ginkatingala sang grupo ang maka-parked nga tricycle sa madulom nga bahin sang baybayon, rason nga ila ini ginpalapitan para mahibaluan kun ini ang gin-abandonar.
Nagduda sila nga may ginahimo nga milagro ang driver kag kaupod sini bangud wala nila makita sa tricycle ang pulungkuan sang mga pasahero.
Sa bulig sang flashlight ila nakita ang duha ka tawo nga nagapakighilawas apang sang masanagan hinali nga nagdalagan kag nagpanago ang lalaki kag nabilin ang babaye
Apang sa pagkabalaka sa iya nga tricycle, nagguwa ang lalaki sa iya ginapanaguan kag nagpangayo sang pasaylo sa ila nahimo.
Nagpromesa man ini sa opisyal sang barangay nga indi na magsulit kag naghinyo nga indi lamang kuntani pag-isugid sa iya asawa ang iya ginhimo.
