ROXAS CITY – Pilas sa ulo ang naangkon sang isa ka tricycle driver matapos aksidente nga bumunggo sa pertahan sang isa ka truck sa Brgy. Baybay, syudad sang Roxas.
Ginkilala ang biktima nga si Jaime Bulahan Jr., 75-anyos residente sang nasambit nga barangay.
Samtang ang driver sang truck ang ginkilala kay Michael Ermino, 31-anyos residente sang Divina St., Talisay Poblacion, Sorsogon.
Sa pagpakig-angot sang Bombo Radyo kay PCpl. Kim Alvin Torres, imbestigador sang Roxas City PNP, ginpahayag sini nga ginbuksan ni Ermino ang pertahan sang Isuzu delivery truck nga iya ginamaneho agud kuntani nga manaog, apang hinali lang bumunggo ang isa ka tricycle rason nga umapok gid ang driver sini.
Ginpahayag nga ginbuligan sang pahinante sang truck ang biktima nga makabangon kag gilayon nga nagpanawag sang responde sa Capiz Emergency Response Team (CERT) agud mahatagan sang pauna nga pagbulong.
Gindala sa Roxas City PNP ang magtimbang nga bahin para sa dugang nga imbestigasyon kag ginkustodiya naman ang mga nasambit nga salakyan para sa nagakaigo nga disposisyon.
