ROXAS CITY – Diskumpiyado ang legal nga driver sang pampasahero nga traysikol sa patigayunon nga operasyon sang mga katapo sang Traffic Management Unit (TMU) nga pagpangdakop sang nagabiyahe nga colorum nga traysikol bisan pa sa kagab-ihon.
Sa interview sang Bombo Radyo kay alyas ‘Gwapo’ ginpahayag sini nga kuntani mas maayo kun sa aga pasangkaron sang mga katapos snag TMU ang pagpanakop sang mga nagabiyahe nga colorum bangud nagadugang pa ang mga ini sa kompetensiya sa mga pasahero, sa ila nga may mga prangkisa.
Dugang pa sang driver nga naintindihan sini nga may pamilya man nga ginabuhi ang mga driver sang colorum, apang indi patas ang ila ginahimo sa ila nga mga legal nga tricycle driver, gani pabor ini nga mahimo makabiyahe ang mga colorum, apang sa gab-i lang.
Nagpabutyag man sang kalain sang buot si ‘Gwapo’ sa TMU bangud sa iya obserbasyon sa tinuig na nga pagpamasada, kaangay sa may pinilian ang mga traffic auxiliary sa pagpangdakop sa mga tricycle, kaangay nalang suno diri sa overloading, bangud kun makit-an ang colorum nga punoan wala ini ginadakop kun i-rason nga private ang motorsiklo, apang sa pagkamatuod nagapamasahero ini, samtang kun ang may city number nga tricycle ang mag-sobra sa pasahero, gilayon dakop.
Nagalaum ang nasambit nga driver nga mangin matuod kag patas ang natalana nga pangdakpanay sang TMU sa mga colorum nga tricycle, nga magasugod subong nga bulan sang Agosto.
