ROXAS CITY – Gindayaw sang mga netizen ang isa ka tricycle driver matapos nga maghatag sang libre nga sakay sa mga senior citizen bilang kabahin sang iya nga Christmas gift sa mga katigulangan sa syudad sang Roxas.
Sa exclusive interview sang Bombo Radyo kay Mr. Policarpio Juralbar 54-anyos sang Barangay Tanque, Roxas City, ginpahayag sini nga nagsugod ang libre nga pagpasakay sa mga senior citizen sang Disyembre 17, 2019.
Suno kay Juralbar nga tinutuyo sini nga mapakita ang iya pagpasalamat sa mga katigulangan nga may daku nga bahin sa iya nga kabuhi, labi na sang tuig 1986 sang nagpasimpalad ini sa Roxas City.
Aminado ini nga indi nangin madali ang iya kabuhi bilang bag-o sa Roxas City, apang ginbuligan ini sang pila ka mga tawo nga may maayo sang kabubut-on kag karon iya naman ginabalik sa iban ang kaayuhan nga nabaton.
Wala ginpanginwala ni Juralbar nga 30 porsyento sa iya ginakita adlaw adlaw ang nadula bangud sa iya ginahimo, apang wala ini nagahinulsol, bangud para sa iya nga gamay lamang ini nga bagay para makahatag serbisyo sa mga senior citizen.
Samtang madamo nga mga netizens ang nag-interes sa nakapaskil sa tricycle ni Juralbar nga ‘’Libre nga sakay sa mga Senior Citizen’’ rason nga ginpost ini sa facebook nga gilayon nangin viral.
Gintawag pa sang pila ka mga pasahero nga nakasakay sa tricycle nga ‘’Good Samaritan’’ si Juralbar nga dapat pamarisan man sang iban nga tricycle driver.
