ROXAS CITY – Boluntaryo nga nagpadulong sa Roxas Component City Police Station (RCCPS) ang tricycle driver nga ginaalegar nagbastos kag gindala sa nagkalain-lain nga lugar ang isa ka dalagita antes gindul-ong sa ila puluy-an sa Barangay Banica sini nga syudad kagab-I.
Sa interview sang Bombo Radyo kay Vengador dela Cruz, sa legal nga pang-edaron kag residente sang Brgy. Dumolog, suno diri wala siya sang malain nga intensyon batuk sa dalagita bangud may yara man ini sang kabataan kag gintanyag pa sini ang iya nga city number nga kuhaan sang laragway agud indi pagkulbaan ang biktima.
Suno diri, kinaangdan na niya nga maglahug istorya sa mga pasahero kag wala ini nagalaum nga mahadlukan sa iya ang biktima bangud nagapatawa man ini samtang nagahinalaan sila.
Sa kamatuoran suno diri, wala na niya ginbaton ang plete sang dalagita bangud naluoy siya kag ginhambalan pa nga ibakal na lang sang pamahaw.
Apang, ginkakibot na lamang niya nga may yara na sang reklamo batuk sa iya may kaangtan sa nasambit nga insidente kag gilayon nga nagpadulong sa estasyon sang kapulisan agud klaruhon ang iya pangalan.
Pahayag ni dela Cruz nga nakapangayo na ini sang pasaylo sa pamilya sang biktima kag nagapromisa nga indi na pagliwaton kag magaserbi bilang leksyon sa iya ang natabo.
Sa pihak nga bahin, magapangatubang naman sa penalidad si dela Cruz bangud sa illegal attachment kun sa diin iba ang nagapanag-iya sa city number nga iya ginagamit kag natalana nga igaforward sa Tricycle Franchising and Regulatory Unit (TFRU) para sa nagakaigo nga disposisyon.
