ROXAS CITY – Gunkumpirmar ni Mr.Gonzalo Andrada pinuno sang Traffic Management Unit (TMU) nga naghimo sang iya kaugalingon nga sticker ang driver sang tricycle nga nadakpan matapos nga nagabyahe nga colurom sa adlaw kag gab-i.
Sa interview sang Bombo Radyo kay Andrada ginpahayag sini nga sa ila pag-imbestiga sa amu nga tricycle driver, nahibaluan nga ginkopya lamang sini ang mismo nga desinyo sang steel plate nga nagikan sa TFRU agud indi masal-an nga colurom.
Suno kay Andrada ang nasambit nga driver ang residente sang banwa sang Panitan kag nagabyahe sa syudad.
Mahibaluan nga natigayon nga madakpan ang amu nga driver sang katapo sang Traffic Management Unit (TMU) sa may bahin sang Barangay Tiza, sining syudad.
Gilayon man ini nga gin-isyuhan sang ticket para sa nagakaigo nga penalidad.
Sa karun, nagapakig-angut na ang TMU sa talatapan sang TFRU sa posible penalidad nga ginlapas sang amu nga tricycle driver.
