ROXAS CITY – Ginpaidalom na sa drug-test sa syudad sang Iloilo ang isa ka tricycle driver matapos nga nadakpan sa drug buy bust operation sang gintingub nga pwersa sang Station Drug Enforcement Team (SDET) sang President Roxas Municipal Police Station, Ponteverda PNP kag Pilar MPS sa Barangay Marita, President Roxas, Capiz.
Matandaan nga ginkilala ang arestado kay Fred John Peñalosa 24-anyos kag residente sang Sitio Redland, Barangay Poblacion sang nasambitan nga banwa.
Narekober sa posisyon ni Peñalosa ang 3 ka sachets nga suspected shabu, 1 ka unit sang motorsiklo kag P1,000 nga drug buy bust money.
Mahibaluan nga isa ka anay drug surenderree sang ila barangay ang nasambit nga suspetsado.
Natalana naman ini nga pasakaan sang kaso nga paglapas R.A 9165 ukon Comprehensive Dangerous Drugs Act of 2002.
Sa karun, nagapabilin ini sa karsel sang President Roxas PNP ang nasambitan nga suspetsado para sa nagakaigo nga disposisyon.
