ROXAS CITY – Wala maghuna-huna ang driver sang tricycle nga may city number nga 2844, nga mahuy-an ini sa social media matapos ang post sang himata sang duha ka estudyante nga nga ginaalegar nagsukot ini sang P50 nagikan sa Capiz NHS padulong sa Hermano subd., Brgy. Punta Tabuc, sini nga syudad.
Sa pagpadulong ni Manuelito Balgos, driver kag operator sang nasambit nga tricycle, ginpahayag sini nga subong pa lamang ini naka-eksperyensiya sang kahuy-anan, sa iya masobra 20-anyos nga pagbiyahe sa syudad.
Pagsaysay sini nga pasado alas-5 kahapon sang hapon, Setyembre 29, sa iya paglabay sa Capiz NHS nagpanawag ini sang pasahero nga kun sin-o ang magapadulong sa Burgos ukon Boulevard, bangud iga-ulayhon nalang sini sa iya pagsugat sa eskwelahan, sang iya apo sa Tanque.
Suno pa sa driver nga nagsakay ang duha ka estudyante, sa pagdumdom nga sa boulevard ang mga ini magapadulong.
Bangud sini, nagpasakay man si Balgos sang dugang nga pasahero nga nagpara padulong sa CPC engineering campus.
Pag-abot sa Boulevard, nagpundo ang driver sa pagdumdom nga ‘Gaisano’ ang ginhambal sang duha ka estudyante, apang nagsiling ang mga ini nga ‘Hermano’.
Gani gindul-ong sang driver ang isa ka pasahero sa engineering campus antes nagpa-Hermano, sa Brgy. Punta Tabuc.
Pag-abot sa lugar, namangkot ang mga estudyante nga kun pila ang plete, ginklaro ni Balgos nga wala ini nagsukot sang P50, kundi ang mga estudyante ang boluntaryo nga naghatag sang nasambit nga kantidad kag gilayon man nga nagtalikod.
Dugang pa ni Balgos, nga nalipat ini magpasalamat bangud sa iya pagdumdom nga kabubut-on sang mga pasahero ang paghatag sang P50.
Ginkakibot lang sini pagkagab-i nga ginbalitaan nga naglapta na sa Facebook ang iya laragway sang iya city number.
Mensahe sini sa nasambit nga mga estudyante nga kuntani nagpangusisa anay antes mag-post kag pareho lang sila nga wala nag-intindihanay, bangud ang kahuy-anan sang tawo indi na mabalik.
Boluntaryo man ini nga magapadulong sa talatapan sang Traffic Management Unit (TMU) agud maghatag sang iya bahin sa natabo.
