ROXAS CITY – Hugot nga ginpanginwala ni ‘Michael’ ang tricycle driver nga ginpahayag nakakita sang adult diaper nga may unod nga fetus, nga ini man ang naghaboy sa may bahin sang Barangay Talon, Roxas City, sang tinalikdan nga gab-i.
Ini ang ginpahayag sang driver, matapos ang nagaguwa ang nasambit nga alegasyon, kag sang mainterview sang Bombo Radyo.
Suno diri, wala sang kamatuoran nga ginbayaran ini sang P800 agud ihaboy ang amu nga diaper sa madulom nga bahin sang dalan.
Sa pagkamatuod, iya ini nga ginpahibalo sa barangay officials sa amu nga barangay sang nakita sini ang amu nga diaper sa dalan, sang nagpamasahero ini sa amu nga gab-i.
Sa una niya nga pagkakita, suno diri nga wala niya gilayon ginsapak apang sang nakapauli na ini sa ila balay, didto kag nagpalangurog ini kag wala nakuha sa iya panumduman ang amu nga diaper sa dalan rason nga ginpakamaayo sini nga balikan, kag diri nakit-an ang amu nga fetus.
Mensahe sini sa ginikanan sang fetus, nga makonsensya sa ginhimo nga sala kag atubangon ini.
