Patay ang driver sang tricycle samtang pilason naman ang iya pasahero matapos mabunggu-an sang Ceres bus sa National Highway sa Barangay Bito-on Ilaya, Cuartero, Capiz.
Ang mga biktima amo sanday alyas Rene, 68-anyos, driver sang tricycle, kag alyas Nie, 35-anyos, pasahero, nga lunsay residente sang nasambit nga lugar.
Samtang ang driver naman sang bus amo si alyas Mau, 41-anyos, residente sang Barangay Masayo, Tobias Fornier, Antique.
Sa interview sang Bombo Radyo kay Police Major Jesse Lepaña, Officer-in-Charge sang Cuartero Municipal Police Station, iya ginpahayag nga ginasubay sang duha ka mga salakyan ang pareho nga dereksyon sang dalan sang hinali nga nadulaan sang control sa manebela ang driver sang bus kag nabunggo ang ginasundan sini nga tricycle.
Suno kay Lepaña, bangud sa mabaskog nga impact, ginbawian sang kabuhi ang tricycle driver.
Samtang, yara naman sa estable nga kondisyon ang pasahero sini matapos mahatagan sang nagakaigo nga pagbulong.
Sa subong, nagapabilin sa kustodiya sang Cuartero Municipal Police Station ang driver sang bus para sa nagakaigo nga disposisyon.
