BITO-ON ILAYA, Cuartero, Capiz – Patay ang isa ka tricycle driver matapos ang nagluntad nga vehicular accident sa National Highway sang Barangay Bito-on Ilaya, Cuartero.
Matandaan nga natabo ang insidente September 22 sa takna sang 2:40 sang hapon kun sa diin involved ang isa ka bus kag motorcycle vehicle.
Ginkilala ang biktima kanday alias Rene, 68-anyos kag pasahero sini nga si aliasb Nie, 35-anyos nga lunsay residente sang nasambit nga lugar, samtang ang driver naman sang bus amo si alias Mau, 41-anyos residente sang Barangay Masayo Tobias Fornier, Antique.
Sa interview sang Bombo Radyo kay Police Major Jesse J Lepaña, Officer-in-Charge sang Cuartero Municipal Police Station, iya ginpahayag nga pareho ang direksyon sang duha ka salakyan nagabiyahe pakadto sa Dumarao, Capiz, samtang hinali naman nga binunggo sang bus ang likod sang motorcycle kag nag-apok naman ini sa gilid sang kalsada nga nagresulta sa pagkasamad sang duha ka indibidwal sa nagkalain-lain nga parte sang kalawasan samtang wala naman sang injury ang driver sang bus.
Suno kay Lepaña, ang natabo nga insidente gilayon naman ginrespondihan sang Cuartero MPS kag gindala ang naman ka indibidwal sa sa pampubliko nga hospital, kag sa kahapon nga adalw na release naman ang pasahero sini, apang sa masubo nga balita bangud sa tuman ang impact sa driver sang tricycle ginbawian ini sang kabuhi September 22 sa takna 8:20 sang kagabihon.
Pahayag pa niya, madugay na nga nagpahamtang ang Cuartero MPS sang signage agud mapahanumdom ang mga motorista nga maghalong kag limitahan ang kadasigon sa pagmaneho para malikawan ang mga aksidente.
Sa karon, yara sa kustodiya sang awtoridad ang driver sang bus, samtang ginahulat naman sang investigator ang desisyon sang pamilya sang biktima kon mapasaka sang kaso may kaangtanan sa reckless imprudence resulting in homicide, physical injury, kag damage to property.
