ROXAS CITY – Nakit-an na ang tricycle nga ginpahayag ginkawat sa Sitio Libot, Barangay Luctogan, Roxas City sadtong Hulyo 16.
Ginkilala tag-iya sang amu nga tricycle kay Berwil Aranzado yara sa legal nga pang-edaron kag residente sang amu nga barangay.
Mahibaluan, personal nga nagdangup si Aranzado sa talatapan sang Bombo Radyo Roxas agud magpanawagan nga nadula ang iya tricycle.
Sa panaysayon sini sa nasambit nga petsa, takna alas 8:00 sang gab-i sang ginparking sini niya ang iya tricycle sa kilid sang dalan malapit sa ila puly-an, apang sa iya pagbugtaw takna alas 8:30 sang aga natalupangdan na lamang niya nga wala na ini.
Bangud sini, ginpakamaayo ni Aranzado nga magpadulong sa talatapan sang Roxas City PNP agud i-report ang amu nga natabo.
Apang, makaligad ang pila ka adlaw nga pagpangita nakit-an sini ang tricycle sa maligwin nga bahin sang Pueblo De Panay sa Barangay Dinginan apang, wala na ini sang motorsiklo kag side car na lamang ang nabilin.
Panawagan ni Aranzado sa kung sin-o man ang makakita sang amu nga tricycle nagaduag dirty white nga may City Number 2152 kag naka rehistro sa pangalan ni Eden Adrias, magpakig-angut lamang sa numero nga 09633918886.
Sa karun, padayon pa ang imbestigasyon sang mga otoridad angut sa nasambit nga insidente.
