ROXAS CITY – Aksidente nga nagbungguanay ang Tricycle, Truck kag salakyan sa may bahin sang Barangay Bolo, Roxas City.
Ginkilala ang driver sang Motoposh nga tricycle kay Jerry Boy Cabanos 39-anyos kag mga sakay sini nga sanday Manilyn Canabos 35-anyos, Argelyn Dilla 42-anyos, Jose Navarro 63-anyos, kag duha ka mga menor nga lunsay residente sang Barangay Intampilas, Panitan Capiz.
Samtang ang driver naman sang Hino Dropside nga Truck ang ginkilala kay Rexnel Teodosio 43-anyos kag residente sang Happy Homes, Barangay Sibaguan, Roxas City kag ang driver naman sang Toyota Vios Sedan ang ginkilala kay Rene Dela Torre 62-anyos kag residente sang Block 4, Lot 6, Lily St. Vilas II, Primativa Homes, Baliuag, Bulacan apang temporaryo nga nagapuyo sa Barangay Cogon, Panitan, Capiz.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ginasubay sang driver sang tricycle ang dalan nagikan sa Barangay Lanot kag padulong kun tani sa city proper aksidente ini nga nabungguan sang Toyota Vios nga nagasunod sa ila.
Bangud sa impact, nagtabog sa pihak nga linya sang dalan ang tricycle kag aksidente naman nga nabungguan sang Hino Dropside nga truck nga padulong naman kun tani sa Barangay Lanot sining syudad.
Nag-angkon sang pilas sa nagkalain-lain nga parte sang kalawasan ang mga biktima nga madasig naman ginrespondihan sang katapo sang Capiz Response Team (CERT) kag Roxas City Emergency Team (RCERT) agud dapatan sang pauna nga pagbulong antes ginpadangat sa ospital.
Sa karun yara na sa kustodiya sang Roxas City PNP ang tricycle kag salakyan para sa nagakaigo nga disposisyon.
