Gin-akusaran ni anay senador nga si Antonio Trillanes IV ang Senado sa idalom sang liderato ni Alan Peter Cayetano nga nagadala umano sang isa ka “constitutional crisis” bangud sa paghatag sini sang protective custody kay Ronald dela Rosa agud mapunggan ang posible nga pagdakop sang National Bureau of Investigation base sa warrant sang International Criminal Court.
Suno kay Trillanes, wala sang legal nga kusog ang resolusyon nga gin-aprubahan sang Senado nga nagasiling nga kinahanglan anay sang warrant halin sa lokal nga korte antes kilalahon ang arrest order sang isa ka foreign tribunal. Dugang pa niya, simbolo lamang ini sang sentimyento sang mga senador kag indi mahimo nga mangibabaw sa nagapadayon nga mga layi sang pungsod.
Ginpahayag man ni Trillanes nga mahimo gamiton nga basehan sa posible nga pag-aresto kay Dela Rosa ang Republic Act No. 9851 nga nagasumpo sa krimen batok sa katawhan. Ginpat-od man niya nga may desisyon na ang Korte Suprema nga nagakilala sa hurisdiksyon sang ICC sa Pilipinas. Nagalaum man siya nga temporaryo lamang ang presenteng liderato sa Senado agud mabalik ang iya ginatawag nga “katinuan kag dignidad” sang institusyon.
