ROXAS CITY – Nag-file na sang reklamo nga plunder si anay Senador Antonio Trillanes IV sa Department of Justice (DOJ) kaangut sa ginapahayag anomalya nga paghatag ni anay President Rodrigo Duterte sang kontrata sa tatay kag utod ni Senador Bong Go.
Sa 30 ka panid nga reklamo ni Trillanes nga ginsumiter sa DOJ, ginpahayag sini nga 184 nga kontrata ang ginhatag sang nakaligad na administrasyon kanday Deciderio Lim Go kag Alfreso Armero Go, nga tatay kag utod sang senador.
Naglab-ot suno diri sa ₱6.6 billion ang balor sang kontrata nga nakuha sang mga Go sa pihak nga indi kuwalipikado ang mga ini bangud sa limitado nga ikasarang sa pinansiyal kag operational capacity.
Magluwas pa ini sa kapaslawan nga matapos sang kompanya sang mag-amay nga Go ang gin-uyatan nila nga mga proyekto sang gobyerno.
Ginpahayag pa ni Trillanes nga posible nga madalahig man ang iban nga dalagkuan nga kompanya nga kaupod ukon kakunsabo sang pamilya Go.
Ginpahayag naman sang anay senador nga sa DOJ siya nag-file sang reklamo kag indi sa Ombudsman bangud sa madali ang access sini sa mga dokumento kag impormasyon nga magahalin sa natungdan nga mga ahensiya sang gobyerno para sa imbestigasyon sa isyu.
