ROXAS CITY – Yara na sa kostodiya sang tag-iya ang ginmotornap nga tricycle matapos nga gin-abandonar ini sang wala makilala nga suspek sa Barangay Lawaan, sining syudad.
Nahibaluan nga nagparekord sa Panay Municipal Police station si Dennis Catalan 32-anyos, tricycle driver sang Panay Ville Housing, Poblacion Ilaya, Panay matapos nga ginmotornap ang tricycle nga ginparked sa guha sang ila balay sang Enero 21, 2020.
Ginkakibot na lamang sini sang gin-impormar sang kapulisan nga may nakita nga tricycle nga ginbilin sa Barangay Lawaan, sa diin sang iya ini ginpadulungan positibo sini nga na-identify ang ginamaneho nga tricycle.
Samtang gilayon man nga ginpahibalo ni Catalan ang tag-iya sang tricycle nga si Donisio Rose.
Wala na sang plano pa ang tag-iya nga padalman pa ang insedente, bangud ang importante nga nabalik na ang tricycle nga nagaserbe nila nga palangabuy-an.
