Ginpataas sang Philippine Atmospheric, Geophysical and Astronomical Services Administration (PAGASA) ang Tropical Cyclone Wind Signal (TCWS) No. 1 sa pila ka bahin sang Cagayan kag Isabela matapos nangin tropical depression ang weather disturbance nga gina-monitor sa sidlangan sang Southeastern Luzon.
Sa weather bulletin sang PAGASA nga ginpaguwa las 11:00 sang gab-i sang Miyerkules, ginpahayag sang ahensya nga ang sentro sang Tropical Depression Kiyapo ang nahamtang sa 1,080 kilometers sa sidlangan sang Southeastern Luzon.
Ang bagyo may kabaskugon nga 45 kph malapit sa sentro, pagmadlos tubtob 55 kph, kag central pressure nga 1004 kph.
Nagahulag ini sa nakatundan-aminhan-nakatundan nga direksyon sa kadasigon nga 25 kilometros por ora.
Apektado sang TCWS No.1 ang nasidlangan nga bahin sang mainland Cagayan, lakip ang mga banwa sang Santa Ana, Gonzaga, Lal-Lo, Gattaran, Baggao, Peñablanca, Santa Teresita, kag Buguey.
Lakip man sa idalum sang Signal No.1 ang nasidlangan nga bahin sang Isabela, lakip ang Maconacon, San Pablo, Cabagan, Tumauini, Ilagan City, Divilacan, Palanan, San Mariano, kag Dinapigue.
Suno sa state weather bureau, posible nga mapataas ang warning tubtub sa Signal No.2 ukon Signal No.3 depende sa paghulag kag kabaskugon sang bagyo.
Samtang, ang ginpabaskog nga Southwest Monsoon ukon Habagat kag ang base sang Bagyo Kiyapo ang magadala man sang mabaskog tubtub pagmadlos nga hangin sa Sarangani, Davao Occidental, kag Davao Oriental.
Una na nga ginpahayag sang PAGASA nga mahimo magpalapit ukon mag-landfall ang bagyo sa probinsya sang Cagayan sa tunga-tunga sang Biyernes, Hulyo 24, kag Sabado, Hulyo 25.
Ginalauman nga maapektuhan sang bagyo Kiyapo ang Northern Luzon kag pila ka bahin sang Central Luzon, apisar nga indi ini direkta nga mag-landfall.
