Nagsulod na sa Philippine Area of Responsibility (PAR) Tropical Storm “Jangmi” mga alas 12:30 sang kaagahon, Mayo 29, kag pagatawgon nga “Domeng,” suno sa Philippine Atmospheric, Geophysical and Astronomical Services Administration (PAGASA).
Base sa pinakaulihi nga bulletin sang PAGASA, ulihi nga nasiplatan ang bagyo sa kalayuon nga 1,200 kilometers nasidlangan sang Southern Luzon.
May kabaskugon ini sang hangin nga nagalab-ot sa 75 kph kag pagmadlos nga nagalab-ot sa 90 kph. Nagahulag ini pa-North sa kadasigon nga 20 kph.
Ginalauman nga magabaskog pa gid ini kag posible mangin typhoon category sa Sabado, Mayo 30.
Base sa forecast, posible nga magaguwa sa PAR ang bagyo sa Lunes, Hunyo 1.
Padayon nga ginabantayan sang PAGASA ang mga hulag sang bagyo samtang ginahingyo ang publiko nga magpabilin nga alerto para sa palaabuton nga mga advisories.
