ROXAS CITY – Magapasaka sang kaso ang ginikanan sang pito ka mga Grade 8 students sang Bago National Highschool sa Barangay Bago, Roxas City batuk sa isa ka estudyante sang nasambit nga eskwelahan nga nangspray gamit ang pepper spray.
Suno sa lola ni Jenny Joy Alantuson, isa sa mga biktima nga indi nila mapalampas ang ginhimo ni Paolo Rogando sa iya nga apo nga dyutayan lamang nalipong matapos nasimhutan ang nasambit nga spra.
Ginpanugyanan man sang pila ka mga manunudlo ang mga ginikanan sang mga biktima nga pasakaan sang panumbungon si Rogando bangud makapila na sini ka beses nga ginhimo niya ang amo nga bagay apang ginapabayaan lamang.
Nahibaluan nga nagapatigayon sang gardening ang mga estudyante sang nagpalapit sa likod sang mga biktima si Rogando kag hinali na lamang nga nangspray sang pepper spray.
Nakabatyag sang pagpalangatol sang tutunlan kag pila ka parte sang ila lawas sa diin iban sa ila ang nagsuka rason nga gindala sila sa ospital.
Matapos mapainum sang bulong, ginpapuli man ang mga estudyante sa ila nga mga balay para makapahuway.
Nahibaluan nga kilala nga troublemaker kag may bad record na sa nasambit nga eskwelahan si Rogando nga yara karon sa kostodiya sang CSWD.
