ILAS NORTE, Dao, Capiz – Nag-atras ang isa ka truck nga kargado sang butong kag nakahalit sa poste, balay kag tiangge matapos mapatay ang makina sini samtang nagasaka sa dalan sa Barangay Ilas Norte, Dao, Capiz.
Ang driver amo si alyas Dan, yara sa legal nga pang-edaron, may kompleto nga papeles bulang isa driver kag residente sang Mambusao, Capiz.
Sa interview sang Bombo Radyo kay Police Major Rey C Dordas, Officer-in-Charge sang Dao Municipal Police Station, iya ginpahayag nga nakabaton sila sang report halin sa isa ka concerned citizen parte sa aksidente, nga gilayon man nila nga ginrespondehan kag ginkumpirmar.
Suno kay Dordas, nagabiyahe ang truck nga kargado sang butong sang pag-abot sa bahin sang dalan nga takason, wala na ini nakasaka bangud napatay ang makina. Bangud sini, nag-atras ang truck kag naigo sa isa poste, puluy-an sang umagad sang isa ka barangay kagawad, kag isa ka tiangge, nga nag-angkon sang minor nga kahalitan.
Pahayag pa niya, ang lugar kurbahon kag takason, nga mahimo nga isa sa mga rason nga na-aberya ang truck sa pagsaka. Apang, padayon pa ang imbestigasyon sang kapulisan agud mahibaluan ang mga sirkumstansya sang insidente.
Dugang pa sang natungdan, may inisyal na nga pag-istoryahanay sa tunga sang tag-iya sang truck kag mga tag-iya sang mga naatrasan nga propiedad, kag handa man suno sa impormasyon nga ila nakuha ang tag-iya sang truck nga magbulig sa pagpakay-o sang mga naguba. Padayon naman ang imbestigasyon agud mahibaluan ang desisyon sang mga tag-iya sang propiedad. Kon indi sila magkasugot, posible nga pasakaan sang nagakaigo nga kaso ang driver.
Sa karon, ginapahanumdom sang kapulisan ang mga motorista nga inspeksyonon anay ang ila mga salakyan antes magbiyahe kag siguruhon nga kaya sang salakyan ang dalan nga pagaagyan, ilabi na sa mga kurbahon kag takason nga lugar, agud malikawan ang kaangay sa sini nga mga aksidente.









