ROXAS CITY – Sunog ang unahan nga parte sang truck, matapos hinali lamang ini nga nag-aso kag nasunog sa Barangay San Fernando,Pilar Capiz.
Ginkilala ng driver sang truck nga si Salvador Baltar, 47-anyos kag pahenante sini nga si alyas Christiano 34-anyos
nga lunsay mga residente sang Barangay San Esteban sa amu nga banwa .
Sa interview sang Bombo Radyo kay FO1 Jerwin Castañales, Chief Investigator sang Pilar-Fire Station, ginpahayag sini nga may nabaton sila nga report nga may yara sang truck nga nasunog sa lugar.
Suno kay FO1 Castañales nga base sa mga nakakita antes natabo ang sunog nakit-an sang mga ini nga may yara na sang naga-aso sa may engine part sang amu nga truck.
Pahayag sang driver nga gulpi lamang nga napatay ang makina sang truck kag sa ila nga pagtsekyar bangud indi na maliso ang manuebela, nakit-an na sini nila nga may yara na sang kalayo.
Gintinguhaan pa kun tani nila nga palungon ang kalayo, apang indi na ini makontrol.
Mahibaluan nga nagikan sa Kalibo ang amu nga truck nga may karga nga graba kag padulong kun tani sa Sara, Iloilo sang natabo ang insidente.
Nagsugod ang amu nga sunog pasado 3:26 sang hapon kahapon kag gindeklarar nga fire out 3:36.
Ginbulubanta yara sa kapin P1.5-M ang nangin kahalitan sang nasambit nga sunog.
Sa karon, nagapadayon pa ang imbestigasyon sang BFP-Pilar angut sa insidente.
