Nagapati ang mga Filipino sa Estados Unidos sang Amerika nga indi sila ang target sang administrasyon ni President Donald Trump sa pagpatuman sang mas hugot nga immigration laws kasunod sang pagdakop kag deportation sang mga imigrante.
Suno kay Bombo Marissa Pascual, International Correspondent sa USA, mas ginpahugtan sang administrasyon ang pagpatuman sang immigration laws nga yara na sadto pa sang panahon sang mga nagligad nga presidente sang Estados Unidos, apang mas istrikto lamang ang enforcement sini sa subong.
Pahayag niya, madamo ang wala sang legal immigration status sa US gani ginapadayon sang gobyerno ang pag-check kag paglimpyo sang immigration records.
Nahibaluan nga may yara sang isa ka Filipino nga green card holder ang gin-deport sang US Department of Homeland Security kag isa man ka Filipina nurse ang gindakop kag gin-detain sang immigration authorities sa Arizona.
Ang Filipina nurse legal nga nagatrabaho sa acute-care telemetry unit sang isa ka ospital sa Phoenix antes siya gin-custody sang US Immigration and Customs Enforcement (ICE) sa Phoenix Sky Harbor International Airport.
Suno kay Pascual, posible nga makabulig sa kaso sang nurse ang iya maayo nga record, ilabi na kun wala siya sang criminal case kag mapakita nga isa siya ka maayo nga citizen kag responsable nga nurse.
May posibilidad pahayag niya nga tugutan ang nurse nga makapauli anay samtang ginahulat ang resulta sang iya asylum process.
Kun maaprubahan ang iya asylum kag maayo ang iya record, may posibilidad nga mapabilin siya ukon makabalik siya sa Estados Unidos sang Amerika.
