Magapasad sang duha ka Executive Order (EO) si US President Donald Trump para sa programa sini nga kakason ang diversity, equity, kag inclusion (DEI), partikular sa military base sang U.S.
Ang isa ka EO magabawal sa mga transgender nga magserbisyo sa U.S. military kag luyag man ni Trump nga kakason ang nauna nga direktiba ni former president Joe Biden sadtong 2021 nga nagatugot sa mga transgender nga magserbe sa militar.
Ang nasambit nga bag-o nga EO ang magahatag pa sang mas hugot nga mga patakaran natuhoy sa paggamit sang mga pronoun kag gender identity, kag dalayon nga pagbawal sa mga transgender nga magserbisyo sa militar.
Suno pa sa White House kabahin lang ini sang isa ka mas lapnagon nga pagpakig-away batuk sa ginatawag ni Trump nga “gender insanity”.
Magluwas pa sini, plano man nga ibalik ni Trump ang mga miyembro sang militar nga ginkakas bangud sa pagbalibad sa COVID-19 vaccine mandate, kag hatagan niya ang mga ini sang back pay akag igabalik man ang ila nga ranggo.
Malipayon naman nga ginpabugal sang White House nga ang mandu nga ini isa ka pagbag-o sa polisiya sang militar agud mahatagan sang prayoridad ang merit-based hiring kag kakason ang mga accommodation para sa mga wala naangkon ang mga pisikal nga kinahanglanon sang serbisyo.
Suno pa diri nga makahatag man ini sang prayoridad sa mga grupo kasubong sang minorya, kababainhan, kag mga may kasablagan sa lawas sa pagkuha sang trabaho.
Samtang, ginapahayag nga ginabulubanta magalab-ot sa masobra 15,000 nga transgender ang pagakakason sa US military, apisar pa nga madugay na ini sa serbisyo, mataas man ukon manubo ang ranggo.
