ALASKA – Wala sang nakasugtanan nga ceasefire sa Ukraine sa pihak sang tatlo ka oras nga pagsinapol nanday Presidente Donald Trump sang Estados Unidos kag Presidente Vladimir Putin sang Russia sa Joint Base Elmendorf-Richardson sa Alaska.
Apisar lunsay gintawag nga “extremely productive” ang summit, ginsiling ni Trump sa media nga “There’s no deal until there’s a deal.” Nagpaandam man ini sang tuman nga silot- ekonomiko kun padayon nga magpamalibad si Putin sa kalinong kag katawhayan.
Nahibaluan indi imbitado sa pagsinapol si Ukrainian President Volodymyr Zelenskyy, butang nga ginakabalak-an sang mga kaalyado sa Europa. Samtang ginapatigayon ang summit, ginreport ang panibag-o nga drone strikes sang Russia sa Ukraine nga ginkapatay sang pito ka mga sibilyan kag ginkapilas sang 17 ka mga indibidwal.
Sa karon, nagapabilin nga wala sang kasugtanan. Padayon ang tensyon sa rehiyon samtang ginahulat ang mga masunod nga tikang sang mga lider.
Nagtililipon man ang mga pro-Ukraine demonstrators sa guha sang base, dala ang mga plakard nga “Alaska Stands With Ukraine”.
Nagpatigayon man sang emergency virtual summit ang mga lider sang EU antes ang pagsinapol agud ipahayag nga indi dapat ipaiway ang Ukraine sa negosasyon.
