Nag-apelar ang Trade Union Congress of the Philippines (TUCP) kay President Ferdinand “Bongbong” Marcos Jr. nga gilayon nga atubangon ang nagalala nga krisis nga gina-atubang sang industriya sang kalamay sang pungsod.
Suno sa Trade Union Congress of the Philippines, dapat ikonsiderar sang Presidente ang mga rekomendasyon nga ginsumiter sang Confederation of Sugar Producers Association Inc. (CONFED), nga ginasuportahan man sang iban pa nga mga stakeholders sa industriya kaangay sang National Federation of Sugarcane Planters (NFSP) kag National Congress of Unions in the Sugar Industry of the Philippines (NAIPC-CPTU).
Ginpahayag ni Trade Union Congress of the Philippines Party-list Representative kag House Deputy Speaker Raymond Democrito C. Mendoza nga padayon nga naganubo ang industriya sang kalamay bangud sa pagnubo sang presyo, patubas, kag demand sa lokal nga kalamay.
Dugang pa ni Mendoza, bangud indi lubos nga magamit ang mga sugar refineries, napilitan ang mga galingan, mangunguma, manugtanom, kag mamumugon nga buhinan ang oras sang pagtrabaho kag batunon ang mas manubo nga kita, nga direkta nga nagaapekto sa ila palangabuhian kag sa ila pamilya.
Ginhatagan man importansya ni Mendoza ang kinahanglanon sang mabakod nga liderato nga handa magpamati sa mga stakeholders sang industriya kag likawan ang mahapos nga mga solusyon kaangay sang sobra nga pag-import sang kalamay, nga suno sa iya makapila ka beses nga napamatud-an nga indi epektibo.
