ROXAS CITY, CAPIZ- Ginpatigayon sang Capiz Police Provincial Office sa pagpanguna sang Police Regional Office 6 ang tuigan nga fitness monitoring sang mga kapulisan sa Capiz Gymnasium, Villareal Stadium, Roxas City.
Sa interview sang Bombo Radyo kay Police Lieutenant Alexander Agbones, Admin Officer sang Police Regional Office 6, iya ginpahayag nga katuyuan sang programa nga masiguro ang pisikal nga kahandaan kag ikaayong lawas sang mga pulis agud mapasangkad ang ila ikasarang sa pagtuman sang mga obligasyon kag katungdanan bilang pulis.
Suno kay Agbones, ang aktibidad ang kabahin sang mas malapad nga programa sang Philippine National Police nga ipabilin ang disiplina, ikaayong lawas, kag kaayuhan sang tagsa ka mga katapo sang kapulisan.
Lakip sa mga aktibidad ang pagmonitor sang body mass index (BMI) check, blood pressure monitoring, flexibility tests, kag cardiovascular endurance exercises kaangay sang 3-kilometer run.
Interviewed by Bombo Jessa Mae Siman De Los Santos
