ROXAS CITY – Nagpabalab-ot sang reklamo sa Bombo Radyo Roxas ang pila ka mga residente bangud sa tuman ka baho sang babuyan ukon tangkal nga ginapanag-iyahan sang tatlo ka mga indibidwal sa Barangay Bolo, Roxas City.
Ang nasambit nga babuyan ang ginapanag-iyahan sang pamilya nanday Alona Blancaver.
Suno kay Russel Berano nga nagaestar malapit sa nasambit nga babuyan nga indi na nila matakuran ang tuman ka baho sang tangkal ukon higku sang baboy sa tagsa ka mag dapya ang hangin pakadto sa ila.
Ginpahayag ni Berano nga na-ospital pa ang iya bata bangud sa tuman ka baho sang babuyan malapit sa ila balay.
Dugang pa sini nga wala na sila gana magkaon bangud sa nasambit nga baho nga ila mahakluan.
Magluwas diri, ginpahayag pa ni Berano nga wala ginalimpyohan sang maayo sang mga tag-iya ang higku sang ila baboy.
Samtang, ginpahayag naman sang iloy sang tagreklamo nga si Nanay Monica nga bisan adlaw kag gab-i nasimhotan gid sini ang baho sang higku sang baboy malapit sa ila balay.
Ginpahayag man ni Nanay Monica nga ginabanyosan na lamang sini sang efficascent oil ang iya ilong agud indi lang masimhotang ang baho sang tangkal.
Dugang pa sini nga sila lamang ang may yara sang kaisog nga magreklamo rason nga ginpalab-ot nila ini sa ila barangay apang ginaalegar nga wala man ginaaksyunan ni Punong Barangay Siolly Andrade.
