ROXAS CITY – Naglab-ot sa 117 degrees fahrenheit ukon 47 degrees Celsius ang nangin temperatura sa Nevada kag Arizona sa bahin sang California, USA sang nakaligad nga semana.
Ini ang ginpahayag ni Mr. Greg V. Aguilar, Bombo International Correspondent sa California sang mainterview sang Bombo Radyo.
Suno diri, makaalarma na ang tuman ka init nga ginapatihan tuga sang climate change bangud sa nagalain- lain nga temperatura kun sa diin gintunaan sang pila ka mga major wildfires ilabi na sa bahin sang Europa kag Amerika, gintuad pa sini nga sa iya 45 ka tuig sa California, kasubong nga kada tuig na ang major wildfires subong indi pareho sadto nga masami ikaisa sa kada 5 ka tuig lamang nagaluntad ang sunog.
Matandaan nagluntad ang Oak Fire sa bahin sang pungsod California malapit sa Yosimite National Park nga madasig naglapta kun sa diin 10% pa lamang ang natpna kag ginakabig pinakadaku nga wildfire sa California subong nga tuig.
Nagapati si Aguilar nga mangin madasig ang paglapta sang nasambit nga sunog bangud man sa mataas nga temperatura, mamala nga kondisyon sa mga kagulangan, kag mabaskog nga huyop sang hangin nga amu ang kombinasyon nga mangin rason sang madasig nga paglapta sang sunog.
Dugang pa ni Aguilar, nagdeklarar na ang gobernador sang state of emergency sa Mariposa County sang nakaligad nga sabado kag ginmanduan ang kapin 5, 000 ka mga residente nga magbakwit agud indi na maulamid pa sa padayon nga wildfire.
Bangud diri, madamo man ang nagpalab-ot sang bulig gikan sa gobyerno kag iban pa nga organisasyon sa mga apektado nga residente.
Sa karon, wala pa sang may nabalhag nga napatay bangud sa Oak fire kag padayon pa ini nga ginatapna.
