ROXAS CITY – Wala ginalauman sang isa ka Pilareño nga isa ini sa mangin representante sang Kingdom of Saudi Arabia (KSA) sa pagahiwaton nga ika-25 nga anibersaryo sang World Championships of Performing Arts (WCOPA), sa Anaheim, California U.S.A. sa Hulyo 22 tubtob Hulyo 31, 2022.
Sa interview sang Bombo Radyo kay Mr. Ace F. Bantay, tumandok sang Barangay Dulangan, Pilar, Capiz kag Warehouse Supervisor sang Medical Supply Ministry Of Health (MOH) sa nasambit nga pungsod, suno diri, malipayon ini nga apisar isa siya ka Filipino, isa ini sa mapalaron nga magapartisipar sa nasambit nga competition.
Dugang pa sang 36-anyos nga Pilareño, nga indi nangin mahupos ang iya naagyan antes makapasakup sa isa ka pangkalibutanon nga paindis-indis.
Nahibaluan nga kapin 70 ka mga pungsod sa bug-os nga kalibutan ang magapasakup sa nasambit nga kompetisyon.
Mensahe sini ilabi na sa mga kabataan, nga indi mag-untat sa ila handum, kag para naman sa mga ginikanan, indi pag i-discourage ang ila mga kabataan kun makitaan nila sang talento.
