ROXAS CITY, CAPIZ- Ginapabugal sang taekwondo community sang Pilipinas ang kadalag-an ni John Leen Joel Aller, 34-anyos, residente sang Barangay Milibili, Roxas City, Capiz nga gold kag silver medalist sa 2025 World Olympics Taekwondo Championship nga ginhiwat sang Hunyo 26 tubtob Hulyo 5, 2025 sa South Korea.
Sa interview sang Bombo Radyo kay Aller, iya ginpakigbahin nga isa sya ka taekwondo instructor kag may kaugalingon nga taekwondo gym sa banwa sang Cuartero kag Dao, sa diin nga nag-umpisa ini sya sa taekwondo sang 2023, apang ang iya nga dedikasyon kag paghanas sa nasambit nga sport ang nag-umpisa sang sya ang Grade 6 pa lamang. Magluwas sa taekwondo, mahilig man ini sa iban pa nga sports kaangay sang table tennis kag basketball, apang ang taekwondo ang iya sini nga nahiligan.
Sa bulig sang Taekwondo Association, napili si Aller nga magrepresentar sang Region 6 kag sang Pilipinas sa prestihiyoso nga kompetisyon sa South Korea. Sa bug-os nga Pilipinas, siya lang ang taglawas nagikan sa Region 6, kag kalakip siya sa walo (8) pa ka atleta nagikan sa pungsod nga nag-join sa nasambit nga international tournament.
Nahibaluan nga sang bulan sang Marso 2025, nabaton ni Aller ang imbitasyon nagikan sa asosasyon agud nga magpasakop sa World Olympics Taekwondo Championship. Matapos ang pila ka semana sang preparasyon, nag-umpisa ini sya ngs mag-solicit dsng pondo agud madugangan ang iya nga budget para sa iya nga biyahe kag mga kinahanglanon para sa kompetisyon.
Pag-abot sa South Korea, nag-umpisa si Aller sa iya nga mga hampang sa sparring category, kun sa diin nakaatubang sini ang atleta nagikan sa Brazil kag nangin madinalag-on ini, naghatag sang dalan sa iya nga kadalag-an. Sa masunod nga hampang, nakighampang sya sa isa ka atleta nagikan sa Nepal kag diri nya natigayon nga nakuha ang Gold Medal sa sparring.
Sa kategorya nga pomsae, nakipagsabayan siya sa isa ka atleta nagikan sa USA. Apisar wala sini nakuha ang gold medal, nakuha man sini sa gihapon ang Silver Medal sa nasambit nga kompetisyon.
Sa pihak sang mga pagtilaw, wala sang iban nga sekreto si Aller sa iya nga kadalag-an kundi ang tayuyon nga training kag dedikasyon sa iya nga sport. Mensahe sini sa mga kabataan nga luyag sundan ang iya nga yapak, “Training lang gid, apisar masakit, ang reward yara sa ulihi, kag sugurado nga malipay ka gid.”
Ang kadalag-an ni Aller isa ka pamatuod sang kusog kag dedikasyon sang mga Pilipino nga atleta nga indi mag-surrender sa pihak sang mga pagtilaw.
Interviewed by Bombo Francis Biñas
