ROXAS CITY – Tuman ang kalipay sang isa ka graduating student nga magagradwar na ini sa iya kurso nga sadto anay ginahandum lamang niya.
Sa interview sang Bombo Radyo kay Ms. Carmel Grace D. Asis Lauz Pharmacist Graduating Student kag isa ka Summa Cum Laude sa Trinity University of Asia ginpakigabahin sini ang iya pila ka mga naagyan samtang naga-eskwela ini sa Manila kag malayo sa iya mga ginikanan.
Suno kay Lauz, indi nangin mahupos ang iya naagyan ilabi na sa iya kurso nga ginkuha bangud kinahanglan suno diri sang pagdisiplina sa kaugalingon agud malampuwasan ang tanan.
Importante lang suno diri nga indi madula ang komunikasyon kag kahibalo nga makibagay sa mga kaupod ilabi na nga may yara ini sang mga classmate nagikan sa iban nga pungsod.
Mahibaluan nga tumandok si Lauz sang Barangay Tiza, Roxas City kag nag-eskwela sa Capiz National High School kag nagpadayon sang iya kolehiyo sa Saint Anthony College sining syudad.
Ginpakigbahin sini nga naka-eksperyensya man ang iya pamilya sang problema pinansyal apang, bangud sa pagbuyluganay sang iya mga utod kag sa suporta nga ginahatag sang iya mga ginikanan, wala sang imposible ang tanan kag ila ini nalampuwasan.
Wala man nila ini suno diri gina-ekspektar nga magagradwar siya bilang isa ka Summa Cum Laude apang dako ang ila nga pagpasalamat bangud nagapati sila nga sa pihak sang ila nga naagyan kag mga sakripisyo bugal ini nga nagikan sa Ginoo.
Nagpalab-ot man sang pagpasalamat si Lauz sa iya pamilya, mga utod, manunudlo, mga abyan kag classmate sa ila ginhatag nga suporta.
Sa karun, plano sini niya nga tutukan ang nagahilapit nga board exam kag plano man sini niya nga magpadayon sa pag-eskwela sang Masteral kag Doctorate.
