ROXAS CITY – On-going ang pagpatuman sang Tulong Panghanapbuhay sa Ating Disadvantaged/Displaced Workers (TUPAD) program sang Department of Labor and Employment (DOLE) sa pila ka munisipalidad sang Capiz.
Ini ang ginkumpirmar ni Ms. Amy Judicpa, pinuno sang DOLE-Capiz, sang mainterview sang Bombo Radyo.
Suno diri, ang pondo sang ila ahensya ang nagagikan sa ginadagdag sang central office pinaagi sa hinyo sang ila partners ukon organisasyon.
Dugang pa sini, nga indi lamang ini iya sang province, kundi may yara man diri ang congressional districts, kaangay sa first kag second district kag nakadepende sa ila kun igatugyan nila sa lebel sang barangay ukon munisipyo ang pagpanglista.
Ginklaro man ni Judicpa nga naga-facilitate lamang sila sang mga documentary requirements agud matsekyar ang insakto nga dokumento kag ginaforward sa region para sa validation, gani pag-abot sa pagpili sang benepisyaryo, nakadepende ini sa ila partners ukon sa naghinyo.
Sa tion nga ang worker nga nagtrabaho ang natukiban nga indi kwalipikado, wala ini ginareleasan sang kwarta.
Sandig sa datos, humalin Enero tubtob subong nga Setyembre, nahatagan na ang 24,000 ka mga benepisyaryo, kag ginalauman nga madugangan pa ini bangud sa nagapadayon nga programa sang ahensya.
