ROXAS CITY – Yara na sa 12,632 ang mga benepisyaryo sang Tupad Program sang DOLE humalin sa bulan sang Enero tubtob sa bulan sang Hunyo 2024 kun sa diin naglab-ot na sa masobra P66-Million ang pondo nga na-release sa duha ka quarter sa probinsya.
Sa interview sang Bombo Radyo kay Mr. Joselito Dela Banda, Provincial Director sang DOLE Capiz, ginpahayag sini nga ang amo nga numero ang posible nga madugangan pa kay nagahulat lang sila sa DOLE kun ano nga munisipyo ang pagapondohan para ipatuman ang programa.
Dugang pa ni Dela Banda nga sa subong wala man sang reklamo nga ginapalab-ot sa ila talatapan pag-abot sa pag-identify sang mga benepesyaryo sang programa nga kun ikumparar sang nagligad nga mga tinuig ang mga barangay opisyal ang wala nagasunod sa guidelines.
Sa karon nagapadayon ang ginapatigayon nga orientation sang DOLE sa tagsa ka mga banwa nga may pondo sa amu nga programa kag ginapaintindi ang mga ini sa hugot nga implementasyon sang programa nga nagakadapat nga insakto.
