Posible sa gihapon nga makuha sang Senate Impeachment Court ang kinahanglan nga two-thirds nga boto para sa impeachment trial ni Vice President Sara Duterte, bisan pa may pila ka mga senador nga posible indi makatambong sa mga trial.
Sa interview sang Bombo Radyo kay Raoul Manuel, National Council Member sang Karapatan, iya ginpahayag nga ang kinahanglanon nga 16 ka boto sa 24 tanan ka senador, mahimo sa gihapon makuha sang impeachment court basta may bastante nga numero sang mga senador nga makaboto sa katapusan.
Suno kay Manuel, posible sa gihapon ang pagboto sang mga nagatindog nga senator judges apisar nga suspended si Senator Jinggoy Estrada, wala pa nagapakita sa publiko si Senador Ronald “Bato” dela Rosa kasunod sang ICC warrant batok sa iya, kag may pending nga kaso naman nga ginapangatubang si Senator Rodante Marcoleta sa Sandiganbayan.
Dugang pa niya, ang importante ang mga senator-judges nga makapartisipar sa impeachment proceedings bangud sila ang magahimo sang desisyon base sa mga ebidensya kag sa Konstitusyon, kag indi sa pulitika ukon sa presyur sang bisan sin-o.
Nagalaum man ang natungdan sang patas, transparent kag magasunod sa due process nga impeachment trial agud mapabakod ang accountability sa gobyerno kag mapadayon ang pagsalig sang publiko sa mga institusyon sang pungsod.
