ROXAS CITY – Nadismaya ang pila ka senior citizens matapos nagpila kag naghulat sang tuman ka lawig agud makakuha sang Unconditional Cash Transfer (UCT) ATM card sang Sabado, Oktubre 8 sa banwa sang Sapian.
Mahibaluan ang UCT isa ka programa sa idalom sang Train Law sang gobyerno nasyunal.
Sa interview sang Bombo Radyo sa wala na ginhingadlan nga Concerned Citizen nga residente sang Brgy. Bilao, Sapian, suno sa iya alas-7 palang sang aga nagdinaguso na ang katigulangan, samtang alas-9 na nag-abot ang personnels sang Land Bank kag DSWD nga amu ang naga-asister sa nasambit nga programa.
Ginabulubanta kapin 2,000 ka mga persona ang nagpadulong sa venue gani nagulutok bangud man sa ginpinsan ang bug-os nga 10 ka barangay sa nasambit nga banwa kag ginapahayag nagkalalipong pa ang iban nga tigulang nga may ginasupreher nga balatian.
Ginkalain pa suno diri sang buot sang iban nga seniors bangud alphabetical ang pagtagtaganay sang ATM gani kasubong kanugon ang pagkadto sang temprano kun yara sa ulihi ang apelyido.
Dugang pa sini nga kasubong tunga sa nagpadulong sa amu nga adlaw ang wala nakakuha kag posible sa Oktubre 18 ini sila liwat pangtagaan.
Ginkadismaya man nila nga wala unod nga kuwarta ang nasambit nga ATM bangud ila gina-ekspektar nga sa amu man nga adlaw igahatag ang cash.
Nabatian niya suno diri nga posible sa Oktubre 12 pagasudlan ang ATM sang P4,600 apang wala pa sang kasiguraduhan.
Mahimo man nga himata nalang sang senior citizens ang magpadulong sa venue, apang ginpakamaayo sang mga ini nga personal nga magpadulong bangud madamo pa sang rekisitos para sa authorization sang ila himata.
