ROXAS CITY – Indi magkabalaka ang mga wala madala sa Unconditional Cash Transfer (UCT) Program bangud igalakip ang mga ini sa magatal-os nga programa nga Targeted Cash Transfer (TCT) program.
Ini ang ginkumpirmar ni Mr. Fabelino Bendoy Jr., project development officer IV kag Regional Field Coordinator sang UCT/TCT program, sang mainterview sang Bombo Radyo.
Suno diri, may tatlo ka modality ang pag-avail sini nga programa, ini ang kun ikaw ang kabahin sang Pantawid Pamilyang Pilipino Program (4P’s), UCT Listahanan (mga wala nakasulod sa 4P’s) kag mga senior citizen.
Ginpahayag sini nga nagsugod ang UCT program sang 2018 nga ginakuha ang pondo sa idalom sang TRAIN Law, kag nagtakop na ini nga programa sang 2020, apang na-delay lang sa distribusyon bangud sa pandemya.
Sa mga wala madala sa UCT, may bag-o nga programa ang gobyerno kag ini ang pagabuslan sang Targeted Cash Transfer (TCT) program, kun sa diin, ang mga nakaparehistro sa Senior Citizen pension humalin sang 2020 nga wala malista sa UCT, ang madala na sa listahan sa TCT agud magabaton sang P3,600 nga one-time pension agud makabulig sa ila sa nagatinaas nga presyo sang mga balaklon subong.
Sa karon, gin-amat-amatan na sugod ang TCT program sa pungsod Pilipinas.
Samtang, padayon ang releasing sang UCT sa mga banwa sa Capiz, kag sa karon natapos na ang mga banwa sang Sapian, Maayon, Panit-an, Sigma, Dao kag President Roxas, kun sa diin nakabaton ang mga ini sang cash card nga may unod nga P3,600 nga ginagiyahan sang mga tinawo sang Land Bank.
Sa mga nabilin nga banwa, lauman nga paga-ubuson ang mga ini sa pagpanagtag sang ila cash card antes magtakop ang tuig 2022.
