ROXAS CITY – Pilason ang tricycle driver matapos lab-on sang 66-anyos nga ugangan sang 26-anyos nga ginang sa Barangay Baye Baye, Jamindan, Capiz.
Ginkilala ang biktima nga si Lionel Benigas 37-anyos sang Barangay Baye Baye, Jamindan nga nag-angkon sang pilas sa natuo nga kamot.
Sa exclusive interview ng Bombo Radyo Roxas kay PO3 Elvis Villasis, imbestigador ng Jamindan Police Station, ginpahayag sini nga antes ang insedente ginkatingala ni Eliseo Vigo Sr., ugangan nga lalaki ni alyas Martha ang panghulagon sang umagad na kasubong ginapapauli na ini.
Ginkatingala man sini ang ginpahayag ni Martha nga sa ila nga restaurant na lamang matulog sang amo nga gab-i.
Apang kasubong may nagatulod sa ugangan sang ginang nga magbalik sa restaurant kag agud madula ang iya pagduda, nagbalik ini sakay sa tricycle.
Nagbakud ang iya panagupnop nga may ginatago ang umagad bangud wala naka-lock ang kusina sang restaurant kag may nabatian ini nga gahud sa sulod.
Bangud diri, gilayon sini nga ginpasiga ang dala nga flashlight kag nadakpan sa akto sini ang umagad kag ang kostomer nga tricycle driver nga nagapakighilawas.
Sa kaakig ni Vigo, ginkuha sini ang sandulo kag ginlabo sa kamot ang biktima nga nagapakitluoy nga indi na sila pag-isugid sa pulis.
Apang nagpadulong sa gihapon sa Jamindan PNP si Vigo kag ginsugid ang hitabo sa diin sa pagresponde sang mga pulis, wala na nila maabtan ang duha sa baylo pila ka mga personal nga gamit na lamang ang ila nga nakita.
Indi naman makita si alyas Martha nga gindala sa pagpalagyo ang duha ka mga anak samtang ginpabulong naman sang biktima ang pilas sa ospital.
Nahibaluan nga isa ka katapu sang Philippine Army nga na-assign sa Negros Occidental ang asawa ni Martha nga nahibaluan na ang pagpanunto sa iya sang asawa.
