Nagkasugot ang United Kingdom at France sa isa ka $892 million nga kasugtanan para pabaskugon ang border security kag batu-an ang padayon nga pagtaas sang illegal migration sa English Channel.
Sa idalom sang kasugtanan, maga-alokar ang UK sang tubtob £660 million sa sulod sang tatlo ka-tuig agud pabaskugon ang seguridad sa baybayon sang northern France, kun sa diin nagahalin ang linibo ka mga migrante nga nagatabok padulong sa UK.
Pagagamiton ang pondo sa pagpabaskog sang operasyon sang kapulisan, intelligence units, kag military personnel, subong man sa paggamit sang drones, helicopters, kag upgraded surveillance systems.
Kalakip man sa plano ang mas hugot nga maritime patrols kag pagdugang sang French officers agud tapnaon ang illegal crossings.
Sandig sa mga reports, naglab-ot sa mas ukon menos 41,000 ka-tawo ang nagtabok sa Channel sang 2025. Ginabayluhan sang bag-o nga kasugtanan ang nauna nga deal sang 2023 nga may balor nga £480 million.
