Ginkumpirmar ni Ukrainian President Volodymyr Zelensky nga kontrolado na sa karon sang Ukrainian forces ang 74 nga Russian settlements sa Kursk region bilang resulta sang ginlunsyar sang mga ini nga cross-border operation.
Sa evening address to the nation sang lider sang Ukraine, ginpahayag sini nga padayon ang pag-abanse sang pwersa sang mga ini sa Kursk region kag pagkuha sa mga Russian prisoner nga posible suno diri nga ibaylo sa mga ginbihag nga Ukrainian fighters nga gintawag bilang pagpalawig sang ‘exchange fund’.
Sa ginpaguha naman nga pahayag sang Russian defense ministry, ginpahayag sini nga napunggan sang ila mga army units nga makausad pa ang Ukrainian armoured mobile groups sa iban nga lugar sa Kursk region.
Samtang, ginpahayag naman ni Mykhailo Podolyak, adviser ni Zelensky nga ang ginhiwat nga pag-atake sang Ukraine amo para i-pressure ang Russia nga mag-ugyon sa peace talks bangud wala suno diri naga-gana ang simple nga mga panawagan sa Russia.
Gin-athag naman ni Ukrainian Foreign Ministry spokesperson Heorhii Tykhyi nga indi sila interesado nga sakupon ang teritoryo sang Russia.
Suno diri, ang ginatuyo sang mga ini amo ang ginlunsyar nga cross-border operation para protektahan ang kabuhi sang mga pumuluyo sini gikan sa long-range strikes nga nagikan sa Kursk region.
Nasa masobra 2,000 strikes na suno diri ang ginlunsyar sang Russia gikan sa nasambit nga rehiyon sa mga nakaligad nga bulan gamit ang anti-aircraft missiles, artillery, mortars, drones, 255 glide bombs kag masobra 100 missiles.
