ROXAS CITY – Talk of the town ang nangin post sang isa ka netizen sa social media site nga Facebook, matapos nakita ang ulo sang ginaalegar bastos nga board member nga ginpahamtang sa nagaalburuto nga bulkang Taal.
Makita sa laragway nga ginpost ni FB user Androus Josephus ang tuman nga kaakig kay Board Member Eleuper ‘’Bulilit’’ Martinez, bangud mismo sa tunga sang crater sang nagakalayo nga bulkan sini ginpahamtang ang ulo sang opisyal.
May mensahe man nga nagapahugay kag nagahangkatanay ang duha sa facebook nga nagkuha sang atensyon sang mga netizen.
Madamo ang nadismaya bangud sa ginaalegar bastos nga mensahe nga ginbuy-an sang board member sa nakaaway nga netizen.
Gilayon naman nagdepensa si Board member Martinez kag nagpaathag sa Bombo Radyo nga nakabuhi lamang ini sang indi maayo nga tinaga bangud below the belt kag personal na ang pagtira sa iya sang netizen sa diin ginlaragway sini gamit ang indi maayo nga tinaga kag ginabastos na ang iya nga pagkatawo.
Nagapangayo ini sang pasaylo sa pamilya sang nasambit nga netizen kun nadalahig sila sa ginbuy-an nga tinaga.
