ROXAS CITY – Madamo sang ginpatuman nga proyekto si Mayor Dante Eslabon para sa ikaayo sang pumuluyo kag banwa sang Sigma.
Ini ang ginpahayag ni Mr. William Limjuco, Municipal Information Officer sang mainterview sang Bombo Radyo.
Suno kay Limjuco, sumugod sa pagpungko sang alkalde ginhatagan sini prayoridad ang pagreview sa Revenue Tax Code sang banwa kun sa diin natukiban sini nga wala ginapatuman ang insakto nga pagsukot sang taxes.
Bangud sini, ginganyat sini ang mga business owners nga magkuha sang lisensya kag business permits agud maka-operate.
Ginpabugal sini ang masobra P1-M nga koleksyon sa economic enterprises kag kapin P1.5-M sa charges kag multa sa sulod sang una nga 100 diyas nga pagserbisyo ni Eslabon.
Maluwas sa pagreview sang revenue tax code, may yara man ini ginpain nga pondo para sa pagpalubong, supplemental feeding program para sa mga kabataan kag gilayon nga paghatag sang financial assistance sa sulod sang 8 ka oras.
Nakatuga man ini sang kalipay sa 485 ka mga senior citizens kag persons with disabilities bangud sa ginadul-ong kag ginahatag nga birthday cakes.
Ginsiling ni Limjuco nga prayoridad sang alkalde ang maayo nga pagpanerbisyo rason nga nagbakal ini sang 22 ka mga multicabs kag igahatag sa mga sakup nga kabarangayan agud madasig nga makaresponde sa mga nagakinahanglan.
Mahibaluan nga masami nga ginabaha ang nasambit nga banwa, rason nga nag-alokar ini sang pondo para sa madasig kag dekalidad nga rescue vehicle para sa Sigma MDRRMO kag indi mabutang sa peligro ang kabuhi sang mga responders.
Dugang pa ni Limjuco, madamo pa sang plano sa banwa si Mayor Eslabon kag pagatinguhaan nga mahatag ang maayo nga pagpanerbisyo nga wala sang pinilian.
