ROXAS CITY – Nangin masako para sa mga Traffic Auxiliary, ang una nga adlaw sang pagpatuman sang No Helmet No Driving Ordinance sa syudad sang Roxas.
Ini ang ginpahayag ni Mr. Salvador Barroa Traffic Auxiliary sang mainterview sang Bombo Radyo.
Suno kay Barroa, indi na nila maisip ang ila nga mga nadakpan nga nagabayolar sa nasambit nga ordinansa kag may yara pa sang iban nga nagatuyo nga magpalagyo, apang wala nila ini ginapalagpas.
Mahibaluan nga tinutuyo sang amu nga ordinansa nga maproteksyonan ang tanan nga mga motorista sa halit nga tuga sang aksidente.
Pahayag man ni Barroa nga indi na pagtestingan nga magpalagyo pa bangud posible nga tunaan ini sang aksidente kag kun mahimo lamang sundon na lamang ang ordinansa nga ginapatuman kag magkooperar.
Nagalaum man ini nga pinaagi sini, mangin disiplinado na kag responsable ang tanan nga mga motorista.
