ROXAS CITY – Nangin maayo kag positibo ang una nga adlaw sang face to face classes sa Don Conrado Barrios Memorial School, Baybay, Roxas City.
Sa interview sang Bombo Radyo kay Fredelyn Fuentes Principal II sang Don Conrado Barrios Memorial School, Baybay, Roxas City ginpahayag sini nga sa idalum sang Executive Order No. 13 nga ginpatuman ni Roxas City Mayor Ronnie Dadivas naghatag ini sang kasadya indi lamang sa ila nga mga manunudlo kag estudyante kundi subong man sa mga ginikanan.
Suno kay Fuentes, makit-an sa nawong sang mga ginikanan ang kalipay matapos nga liwat ginpahanugutan nga makabalik ang mga kabataan sa buluthuan.
Apisar suno diri nga ginatudluan ang mga kabataan sa ila puluy-an dako ang deperensya kung yara sila mismo sa eskwelahan bangud makapamati kag matutukan sila sang mga manunudlo.
Mahibaluan nga may yara sang 642 nga mga estudyante ang nasambit nga eskwelahan kag nagasugod ang ila klase 7:30 tubtob 11:30 sang aga kag pag-abot sa hapon, modular na.
Ginpahayag man ni Fuentes nga sa pihak sang mainit nga tyempo, indi tuman nga naapektuhan ang ila mga estudyante bangud madamo sang mga dalagko nga puno sang kahoy ang palibot sang ila buluthuan kung sa diin nagahatag ini sang malamig nga temperatura.
