Nangin madinalag-an ang una nga adlaw sang Fire Prevention Month Kick-off Activity.
Nagsugod ang nasambit nga aktibidad sa isa ka misa nga ginhiwat sa Immaculate Concepción Metropolitan Cathedral kag ginsundan ini sang motorcade sa palibot sang syudad sang Roxas nga ginpangunahan sang Roxas City Fire Station kaupod ang nagkalain-lain nga partner agencies, response team, volunteer groups, media kag mga opisyales sang probinsiya.
Suno kay Provincial Fire Marshal FSUPT Kim Celisio nga madamo pa sang mga aktibidad ang nakatalana nga patigayunon sang Bureau of Fire Protection sa bilog nga bulan sang Marso.
Pila sa mga balantayan nga aktibidad amu ang roadshow, Art Photo Exhibit kun sa diin i-present ang nanari-sari nga uniform sang BFP, Tree Planting, Barangay Fire Olympics 2025, Community Fire Safety Fair, Mangrove Planting, kag Bloodletting/Culminating Activity.
Mahibaluan nga ang bulan sang Marso ang ginakabig nga “Fire Prevention Month” nga gina-obserbar sa bug-os nga pungsod kun sa diin ang pagdeklarar sa sini nga bulan ang sandig sa Presidential Proclamation No.115-A nga ginpagwa sang 1966 ni anay President Ferdinand Marcos Sr.
