ROXAS CITY – Natalana nga mag-abot sa probinsiya sang Capiz ang una nga batch sang mga repatriated Overseas Filipino Workers (OFW’s) buwas nga adlaw (Abril 28).
Ini ang ginpahayag mismo ni Capiz Governor Esteban Evan ‘Nonoy’ Contreras sa ginpatigayon nga sinapol sang COVID-19 Capiz Provincial Inter-Agency Task Force.
Mahibaluan nga bangud sang pagpamalabag sang gobyerno sang siyudad nga himuon nga quarantine facility ang Capiz National High School sa Barangay Tiza, Roxas City, papulion ang nasambit nga mga OFW’s sa ila tagsa ka mga kabanwahanan kag ang mga local government units (LGU’s) na ang ginatugyanan para sa ila teniran nga quarantine facility samtang nagapaidalom sa 14-day quarantine period.
Mahibaluan nga ang nasambit nga mga OFW’s ang lunsay nag-negatibo na sa COVID-19 sa rapid testing sa Metro Manila kag magaagi sa Iloilo kun sa diin sa ila pagpauli sa Capiz, liwat sila nga ipaidalom sa polymerase chain reaction (PCR) test agud masigurado nga hilway sila sa nasambit nga balatian.
Suno kay Provincial Disaster Risk Reduction and Management Office (PDRRMO) Head Judy Grace Pelaez, kalakip sa una nga batch sang OFW’s nga magaabot sa probinsiya ang 8 nga taga-Roxas City; 3 nga residente sang Maayon; 2 sa Mambusao; tag-1 sa Dumarao, Jamindan, Sapian kag Tapaz; kag may iban pa nga wala matumod ang ila nga pagapulian nga banwa.
Para sa 2nd batch sang repatriated OFW’s, 10 diri ang residente sang Roxas City; tag-3 sa Dumalag kag Tapaz; 2 sa Maayon kag Mambusao; kag tag-1 naman sa Panay, Panitan, Pilar, Dumarao, kag Ivisan.
Wala naman malikawan ni Dr. Jocelyn Mosquete, presidente sang Capiz Medical Society nga magpabutyag nga mas maayo kuntani kun isa lamang ka quarantine facility ang paga-teniran sang tanan nga magapalauli nga mga OFW’s agud mas mapahugot ang pag-monitor sa ila samtang nagapadayon ang ila nga quarantine period.
