DUMARAO CAPIZ – Ginpatigayon na ang una nga hearing batuk sa SK Federation President sang banwa sang Dumarao agud masabat ang pila ka mga alegasyon nga ginahaboy batuk sa iya.
Matandaan nga sadtong tinalikdan nga tuig, nagkasugot ang tanan nga miyembro sang Sangguniang Kabataan Council sang Barangay Salcedo sa banwa sang Dumarao agud pahalinun ang ila SK Chairman nga si Glenry Capuso pinaagi sa resolusyon nga ila ginpapasar subong man naghatag sang ila manipesto ang 32 ka mga SK Chairman sa mga kabarangayan nga nagawithraw sang ila suporta.
Ini bangud ginapahayag nga wala nagapatawag sang meeting agud mahinalaan ang mga programa kag aktibidad, wala pag attend sa sesyon sang Sangguniang Bayan sa munisipyo bilang ex-officer member, wala pag-attend sa meeting sang Provincial SK Federation, kag wala pagtrabaho sang iya obligasyon.
Sa interview sang Bombo Radyo sa LIGA President sa nasambit nga banwa nga si Hon. Remuel Dario, ginpahayag sini nga sa ginpatigayon nga pagsinapol hugot nga ginpanginwala ni Capuso ang tanan nga ginahaboy batuk sa iya.
Suno pa kay Dario, tikom-bibig Capuso kag wala mismo nagasabat sa mga pamangkot sa baylo nga ang iya sini abogado ang nagahatag sang sabat.
Samtang, natalana naman sa Enero 22 ang ika-duha nga hearing batuk sa nasambit nga anay SK Federation President.
