ROXAS CITY – Nangin matawhay ang una nga Oplan Galugad subong nga tuig nga ginpatigayon sang Philippine Drug Enforcement Agency (PDEA) sa sulod sang Capiz Rehabilitation Center (CRC) kaina sang aga Pebrero 25, 2025.
Sa interview sang Bombo Radyo kay Jail Warden Arjuna Yncong, ginpatigayon ang amu nga operasyon bangud sa ila nabaton nga report nga posible may masulod ukon may nagsulod na nga droga sa CRC.
Kun matandaan sang nagligad nga bulan nadakpan ang isa ka tricycle driver nga nagdul-ong sang pagkaon nga may unod nga suspected shabu kun sa diin napasakaan na ini sang kaso.
Suno kay Yngcong, wala man sang may nakit-an nga droga sa tatlo ka selda lakip na ang chapel, infirmary, isolation cell, isa ka women cell kag iban nga kubol nga gin-inspeksyon sang PDEA kaina sang aga upod ang tatlo ka K9 dogs.
Pahayag pa sini nga posible kada bulan ukon every quarter na ini patigayunon ang greyhound operations sandig man sa suhestyon sang PDEA.
