ROXAS CITY – Wala nalikawan sang isa ka thai woman nga una nga nalatnan sang 2019 coronavirus (nCoV) sa Thailand nga mangin emosyunal matapos ginpakigbahin ang nangin experiensiya samtang ginpaidalum sa pagbulong.
Suno kay Bombo International Correspondent Cleo Rose Jondonero, lima ka tuig nga nagatrabaho sa Tak, City Thailand bilang manunudlo, nagbakasyon sa Wuhan, China si Jaimuay Saeng 73-anyos sadtong Disyembre 25, 2019 kaupod ang pamilya para magselebrar sang Bag-ong Tuig sa nasambit nga pungsod.
Nagsugod nga magkasakit ang biktima sa pagbalik na sini sa Thailand sang Enero 3, 2020, sa diin gindala ini sang iya pamilya sa Nokornpathom hospital kag ginpaidalum sa monitoring sa sulod sang pila ka adlaw.
Matapos ang medical test sang mga espesyalista nga doktor sa korason kag respiratory illnesses natukiban nga infected ini sang coronavirus.
Wala nangin madali kay Saeng nga mapalayo sa iya nga pamilya, apang wala ini sang nahimo bangud luyag sini nga mag-ayo.
