MANILA-Nagsaka sa 6% ang unemployment rate ukon porsyento sang mga wala obra sa Pilipinas sang Hulyo 2026—ang pinakamataas nga lebel sa sulod sang kapin apat ka tuig, suno sa Philippine Statistics Authority ukon PSA.
Base sa pinakabag-o nga datos sang PSA, yara sa 3.14 milyon ka Pilipino ang wala sang trabaho sang Hulyo. Mas mataas ini kumpara sa 4.9% ukon 2.34 milyon nga unemployment rate sang Hunyo kag 5.3% ukon 2.62 milyon sang Hulyo sang nagligad nga tuig.
Suno kay PSA Undersecretary kag National Statistician Claire Dennis Mapa, amo ini ang pinakamataas nga unemployment rate nga natala sa pungsod halin sang Hunyo 2022.
Apang indi lamang unemployment ang nagsaka, bangod nagtaas man ang underemployment rate sa 12.9% sang Hulyo, halin sa 12.1% sang Hunyo. Ini nagakahulugan nga yara sa 6.33 milyon ka mga trabahante ang may obra apang nagapangita pa sang dugang nga trabaho ukon dugang nga oras sa pagtrabaho.
Mas mataas ini kumpara sa 6.11 milyon nga underemployed sang Hunyo, apang mas manubo naman kumpara sa 6.8 milyon sang Hulyo sang nagligad nga tuig.
Suno sa PSA, isa sa mga kabangdanan sang pagsaka sang unemployment rate amo ang pagdamo sang mga tawo nga nagsulod sa labor force. Nagsaka sa 63.6% ang national labor force participation rate, nga nagdala sa aktibo nga working population sa 52.36 milyon, kumpara sa 48.64 milyon sang Hulyo 2025.
Samtang, nagdamo man ang total employment sa 49.21 milyon sang Hulyo, halin sa 46.05 milyon sang amo man nga bulan sang nagligad nga tuig. Apang, nagnubo ang national employment rate sa 94.0%, halin sa 94.7% sang Hulyo 2025.
Sa sektor sang pangabuhian, pinakadaku nga bahin sang mga trabahante ang yara sa services sector nga nagakabig sang 62.8% sang workforce, sunod ang agriculture nga 19.7% kag industry nga 17.5%.
Ang agriculture kag forestry ang nakarekord sang pinakadaku nga pagdugang sa mga trabahante, nga nagdamo sang 1.03 milyon. Sa pihak nga bahin, manufacturing ang may pinakadaku nga pagnubo, matapos madula ang yara sa 134,000 ka trabaho.
Sa kabug-usan, samtang nagadamo ang mga Pilipino nga nagasulod sa labor force kag nagadugang ang employment, nagapabilin nga daku nga pagsulundan ang pagsaka sang unemployment kag underemployment—nga nagapakita sang panginahanglan sang mas madamo kag mas permanente nga oportunidad sa trabaho.
