Daku ang bulig sang Unified 911 Satellite Command Centers sa mas madasig nga pagresponde sa tion sang emerhensya.
Sa interview sang Bombo Radyo kay Fire Senior Superintendent Bartolome Biliran, Assistant Regional Director for Operations sang Bureau of Fire Protection (BFP) Region 6, iya ginpahayag nga daku ang mabulig sang bag-o nga Unified 911 Satellite Command Center sa pagpadasig kag pagpasangkad sang pagresponde sang mga otoridad sa tion sang emerhensya.
Suno kay Biliran, pinaagi sa isa ka unified nga hotline, mas mangin episyente ang koordinasyon sang BFP, Philippine National Police, emergency medical services kag iban pa nga rescue units sa paghatag sang bulig sa publiko sa tion sang kalamidad ukon aksidente.
Pahayag pa niya, ang Region 6 Satellite Command Center ang isa sa apat ka bag-o nga command centers nga ginpaandar sa Iloilo, Ilocos Norte, Isabela kag Leyte agud mapalapit ang serbisyo sang emerhensya sa mga komunidad kag mapalip-ot ang response time.
Dugang pa sang natungdan, padayon ang pagpalig-on sang koordinasyon sa tunga sang nagkalain-lain nga response agencies agud masiguro nga madali kag epektibo ang paghatag sang bulig sa tion sang pagkinahanglanon.
